Framhaldsaðalfundur verður haldinn miðvikudaginn 23. maí kl. 20 í Skátalundi við Hvaleyrarvatn. Fram verður haldið aðalfundarstörfum frá 9. febrúar þar sem ekki tókst að manna stjórn fyrir þann tíma.

Hefðbundin aðalfundarstörf að því undanskildu að skýrslur stjórnar og gjaldkera er búið að flytja og samþykkja.

Stjórnin

St. Georgsgildið í Keflavík sér um St. Georgsdaginn í ár. Hann verður haldinn laugardaginn 21. apríl næstkomandi.

Það er mæting kl. 14 að Skólavegi 12 í „Upptökuheimili Geimsteins“ og fáum við þar að heyra sögu „Geimsteins“ en synir Rúnars heitins Júlíussonar (í hljómsveitunum Hljómum, Trúbroti og fleirum) þeir Júlíus og Baldur taka á móti okkur.

Eftir það verður gengið upp í Skátahús Heiðabúa og þar verður boðskapur dagsins kynntur okkur og vonandi verður sitthvað skemmtilegt framborið. Allavega verður kaffihlaðborð.  Hvert gildi á að koma með eitthvað skemmtilegt með sér er hér með óskað eftir einhverju í þann hluta samkomunnar.

Það verður farið frá Hraunbyrgi með rútu kl. 13.15. Þátttaka tilkynnist til Kristjönu í síma 5554513 6998191 eða með tölvupósti á kristjana@hhus.is í síðasta lagi 14. apríl. Fjölmennum.

15. mars verður næsti fundur gildisins. Hann verður haldinn í Hraunbyrgi kl. 20.

Yoko Arai Þórðarsons og Egill Þórðarson koma í heimsókn. Yoko er frá Japan og segir frá því hvað dróg hana til Hafnarfjarðar. Rifjar hún upp æsku sína í Japan. Þá er rúmt ár frá frá því að jarðskjálfti af stærðinni 8,9 skók strendur Japan og gríðarleg flóðbylgja gekk á land. Yoko Arai og Egill fóru til Japan í júní síðastliðinn og tóku fjölmargar myndir í Miyako 15. júní og Kesennuma 27. júní.  Á báðum þessum stöðum varð mikið tjón af völdum flóðbylgjunnar sem skall á Japan þann 11. mars 2011.  Sýna myndirnar glöggt þá miklu eyðileggingu sem varð og þá gífurlegu vinnu sem þarf  til þess að byggja upp  bæi og borgir sem urðu fyrir flóðbylgunni.

Yoko og Egill munu segja okkur frá upplifun sinni af þessari ferð og sýna okkur myndir.

Fjölmennum.

Aðalfundurinn var haldinn 9. febrúar. Þar sem ekki tókst að finna fólk í öll embætti var honum frestað fram í maí.  Guðbjörg Guðvarðardóttir gildismeistari gaf ekki kost á áframhaldandi setu í stjórn en féllst á að sitja þangað til annar fengist. Gjaldkeri Jóna Bríet  Guðjónsdóttir gaf ekki heldur kost á sér og tekur Edda M. Hjaltested meðstjórnandi við hennar stöðu fram í maí.

Að öðru leyti var þetta mjög góður fundur þar sem fjallað var vítt og breitt um stöðu gildisins.

Minnum á vinnufund 10. mars í Skátamiðstöðinni við Hraunbæ þar sem rætt verður um stöðu gildanna á Íslandi, framtíð þeirra og fleira.

Fyrsti fundur ársins verður í Tónkvísl, Tónlistarskólanum, í íþróttahúsi Gamla Lækjarskóla kl. 20 fimmtudaginn 12. janúar.

Helena Línudóttir Kristbjörnsdóttir og Markús Elvar Pétursson maður hennar koma og segja frá dvöl sinni á skútunni Sæúlfinum, en þau fóru í stóra siglingu ásamt fjölskyldunni árið 2009 og 2010. Þau fyrirhuga fleiri ferðalög og verður fróðlegt að heyra í þeim.

Helena er Hraunbúi. Nánari upplýsingar er að finna á síðunni þeirra www.siglari.com

Gleðilega aðventu gildisfélagar.

Jólafundurinn verður haldinn í Skátalundi á sunnudag kl. 14.00. Jólasöngvar, jólasaga, jólaguðspjallið, jólakökur, jólasveinninn, jólabrennan og svo jólaskapið.

Hlökkum til að sjá ykkur sem flest og ekki gleyma að koma með meðlætið ykkar góða á hlaðborðið. Heitt súkkulaði verður á könnunni.

Sendi ykkur einnig fréttabréf NBSR Nordic Baltic Sub-Region með fréttum frá Norðurlöndunum og af gildismótinu sem verður í Litháen 13.-17. júní á næsta ári.

Hafið það sem best á aðventunni og um jólin.

Fyrsti fundur á nýju ári verður fimmtudaginn 12. janúar í Hraunbyrgi. Helena Línudóttir Kristbjörnsdóttir mun þar segja frá ferð sinni með fjölskylduna á skútu. En þau sigldu frá Íslandi og suður með strönd Evrópu. Meira um þetta í janúar.

13 manns mættu í dag í Víkina – sjóminjasafn og áttu þar góða stund í yndislegu veðri. Langflestir skoðuðu varðskipið Óðinn og einn hafði meira að segja verið messi um borð. Sjáumst hress á jólafundinum.

Nýr Gildispóstur er kominn á netið, fullur af efni.

Næsti gildisfundur-ferð verður haldinn í Víkinni  Sjóminjasafninu í Reykjavík. http://www.sjominjasafn.is/forsida/

Mæting er í Víkinni Grandagarði 8 laugardaginn 12. nóvember kl. 13.15  http://www.sjominjasafn.is/um-safnid/stadsetning/ Fyrir þá sem vantar far eða vilja gjarnan fljóta með þá ætlum við að hittast við Hafnarfjarðar og safna í bíla. Það verður farið frá Hafnarfjarðarkirkju kl. 13.00.

Víkin er ungt safn í örum vexti og er sýningarými þess núna um 1200 fermetra innandyra. Þar eru fimm sýningar í jafn mörgum sölum sem m.a. rekja þróun fiskveiða og strandmenningar Íslendinga í aldanna rás. Hlutverk safnsins er að safna og miðla upplýsingum um minjar tengdar sjó og sjómennsku, einkum þeim sem gildi hafa fyrir sögu Reykjavíkur.
Nú eru tveir aðalinngangar inn í safnið, Grandagarðsmegin og síðan hafnarmegin.
Þá er varðskipið Óðinn hluti af safninu og liggur við sérstaka safnbryggju. Gestum safnsins gefst kostur á að skoða þetta merka skip. Óðinn tók þátt í öllum þorskastríðunum á síðustu öld og fór að auki í fjölmarga björgunarleiðangra. Víkin-Sjóminjasafnið í Reykjavík hefur að geyma þrjár fastasýningar sem eru allar mjög skemmtilegar og fræðandi. Ævintýraheimur Óðins, þróun Reykjavíkurhafnar og breytingin frá árabátum til togara.

Verð á mann kr. 700.

Síðan ætlum við að fá okkur kaffi í Bryggja – kaffihús sem er í miðju safninu að lokinni skoðunarferð. Mætum hress og kát á eigin bílum. Fyrir þá sem vantar far eða vilja gjarnan fljóta með þá ætlum við að hittast við Hafnarfjarðakirkju  og safna í bíla. Það verður farið frá Hafnarfjarðarkirkju kl. 13.00.